Longa noite de pedra, Laura Sánchez Viqueira, Susana González Aller (4º ESO B)

Gústame moito un poema de Celso Emilio de Longa noite de pedra, xa que é moi curto pero explica ben como foi a experiencia do autor ao ser encarcerado, utilizando símbolos como a noite e a pedra para describir a dureza da realidade e así facer unha crítica social.

Un fragmento deste poema que me gusta é o seguinte, porque describe a frialdade daqueles que ven ao autor sen compaixón, ignorando o seu sufrimento:

O corazón dos homes

que ao lonxe espreitan,

feitos están

tamén

de pedra.

Creo que Celso Emilio fixo unha crítica social da súa época para que puidésemos tomar conciencia e mellorar como sociedade, pero ao ler o poema non vexo grandes diferenzas (á excepción de que eles estaban vivindo na ditadura franquista), pois agora tamén vexo a frialdade das persoas: tanto en comentarios das redes sociais, accidentes ou noticias actuais...

Entristéceme ler o poema e imaxinar o autor tal como describe, na situación na que se atopaban e sen poder expresarse libremente, pero tamén me entristece ver como esa crítica non mellorou co paso dos anos.

Laura Sánchez Viqueira (4º ESO B)

Este poema transmite frialdade (nomeando todo o tempo as pedras), dureza e unha sensación de tristeza e escuridade. Cando fala daqueles homes e dos seus corazóns creo que pode referirse a dúas cousas; por unha parte, a aqueles exiliados pola guerra que observan dende lonxe a situación actual do seu país, cos seus corazóns coma pedras, fríos, ou aqueles homes que participaron na guerra como soldados, persoas novas e que ao mellor non tiñan nada que ver co motivo principal da guerra, pero  que tiveron que participar na batalla como obriga e agora observan ao seu país dende onde estean.

Segundo a miña opinión, este poema expresa moi ben a sensación que estaban a sentir todos os españois despois de rematar a guerra e coa chegada da ditadura de Franco. Falando das cadeas, referíndose á represión, as reixas polos encarcerados... situacións que estaban a suceder na España da época e que se estenderían ata a morte do ditador.

Susana González Aller (4º ESO B)